Føroyska Rynkeby-liðið komið til Paris

Seinnapartin kom stóri føroyski Rynkeby-hópurin á mál í París.

Í ár hevur Team Rynkeby Føroyar verið býtt í tveir bólkar. Tey sum súkkla úr Danmark til Fraklands, og so hevur eitt lið súkklað í alpunum.

Túrurin byrjaði á Norrønu hósdagin í síðstu viku, og síðani leygardagin hevur verið súkklað hvønn dag.

Á ferðini hava tey súkklað fýra dagar í Týsklandi, hava verið og vent í Niðurlondum, ein dag í Belgia og tríggjar dagar í Fraklandi. Tilsamans 1.250 kilometrar og 5.400 hæddarmetrar.

Hjá Team Rynkeby Sornfelli, sum fjallaliðið eitur, byrjaði túrurin í alpubýnum Brides-les-Bains. Tey hava í tríggjar dagar súkklað í alpunum, áðrenn kósin varð sett móti Paris. Tilsamans 945 kilometrar og 13.800 hæddarmetrar.

Fríggjakvøldið hittust føroysku liðini í Melun, sunnan fyri franska høvuðsstaðin og hava fylgst til Paris í dag.

Hetta er 11. árið, at Team Rynkeby Føroyar hevur lið, sum súkklar til Paris. Undirtøkan fyri at vera við í felagsskapinum og áhugin at stuðla innsavningini hjá Team Rynkeby er vaksin á hvørjum ári.

Knapt 100 fólk eru við í toyminum í ár. 74 súkklarar og 21 hjálparfólk.