Fugloyar kommuna við áheitan til vitjandi og ferðafólk

Nú korona er byrjað at gera um seg í Føroyum aftur, kemur Fugloyar kommuna við eini áheitan til ferðafólk.

– Fugloyggin er ikki fólkarík, og her eru fleiri gomul og veik fólk, sum als ikki mugu útsetast fyri smittu. Tí verður heitt á øll vitjandi og ferðafólk til Fugloynna, bæði Hattarvík og Kirkju, um at halda frástøðu, hetta fyri at verja seg sjálvan og bygdafólkið.

Fyri at verja bæði ferðafólk og bygdafólkið í oynni, eiga ferðandi og onnur vitjandi, ikki at venda sær til bygdafólkið, fyri eitt nú at nýta hentileikar, sum ikki eru til staðar í almenna rúminum. Bygdafólk skulu eisini í størst møguligan mun, halda seg hvør sær, sigur kommunan, sum vísir til almennu tilmælini um reinføri og sosiala samveru.

Tilmælini frá kommununi eru galdandi fram til 21. august

• Hav gott hondreinføri, vaska tær ofta og væl um hendurnar. Spritta hendurnar, um tú ikki hevur atgongd til vatn og sápu.
• Hosta og njós í ermuna - ikki í hendurnar.
• Avmarka kropsligt samband við onnur sum til dømis lógvatak, klemm og kinnkoss.
• Hav gott reinføri bæði heima og til arbeiðis.
• Ver sera ansin í støðum, har nógv fólk savnast.
• Minst til altíð at halda frástøðu.
• Minst til, vit kunnu øll vera smittuberar, hóast vit eingin sjúkutekin hava.
• Verið varug við sjúkueyðkenni, ið kunnu benda á coronavirus, t.d. hosta og fepur, og ver heima um tú merkir tær okkurt.