Grønlendingar fara út á gøturnar at mótmæla

Leygardagin verður skipað fyri umfatandi mótmælistilgakum at mótmælt amerikansku ætlanirnar at yvirtaka Grønland.

Tað er ein bólkur av borgarum, sum skipa fyri mótmælistiltakinum, sum verður í Nuuk seinnapartin leygardagin. Bólkurin hevur eisini heitt á fólk í øðrum býum og bygdum at gera tað sama.

Í Nuuk er ætlanin at ganga gjøgnum býin. Gongan endar við amerikanska konsulatið. Talan er um somu rutu, ið varð gingin á eini líknandi stórari mótmælisgongu í fjør.

Ein av stigtakarunum til mótmælisgonguna, Bikki Jepsen, sigur fyri KNR, at grønlendska fólkið hevur verið undir stórum trýsti og ótryggleika hesa seinastu tíðina, og at stundin nú er komin at gera nakað við tað.

- Okkara politikarar og fólkavaldu hava ferð eftir ferð sligið fast, at land okkara ikki er til sølu – og at okkara land ikki bara kann keypast ella yvirtakast við brúk av hernaðarmegi, sigur hon.

Grønlandingar savnaðust í gjár framman fyri amerikansku sendistovuna í Keypmannahavn at mótmæla (Mynd: EPA)

Mótmælistiltakið leygardagin hevur til endamáls at vísa umheiminum, at politikararnar hava stuðul frá fólkinum og fyri vísa samanhald.

- Vit krevja at tað verður virt, at bæði vit sum fólk og okkara land hevur rætt til sjálvsavgerðarrætt. Vit krevja at fólkarætturin og altjóða lóg verða vird, sigur ein annar av stigtakarunum, Avijâja Rosing-Olsen.

Heitt verður á fólk at koma við fløggum, taka myndir og filmar, so boðskapurin frá friðarligu mótmælisgonguni kann verða sendur út um allan heim.

Eisini í Danmark er ætlanin at hava líknandi mótmælistiltøk, eit nú í Aarhus, Aalborg og Odense, skrivar KNR.