Hava fingið tilsamans 5,8 milliónir krónur

Landskassin hevur nú útgoldið meira enn 5,8 mió. krónur í stuðul til fyritøkur, sum hava mist inntøkur orsakað av korona.

Fríggjamorgunin hevði TAKS avgreitt 120 umsóknir um stuðul.

Av teimum 120 fyritøkunum, søgdu 91 seg hava mist millum 60 og 100 prosent av umsetninginum.

Stuðulskipanin hjá TAKS er partur av hjálparpakka 2, og stuðul verður latin til fastar útreiðslur.

Fyri fyritøkur, sum hava mist millum 40 og 60 prosent av inntøkuni, er stuðulin 50 prosent av føstu útreiðslunum. Hevur ein fyritøka mist millum 60 og 100 prosent av inntøkuni er stuðulin 75 prosent. Tó er mesti stuðulin 80.000 krónur um mánaðin.

Hægsta útgjaldið er 240.000 krónur, og tað lægsta er 4.421 krónur. Stuðulin er í miðal 49.117 krónur.