Hendrik Egholm og Christian Nagata keypt P/F Bilasøluna

Hendrik Egholm og Christian Nagata hava keypt partapeningin í P/F Bilasøluni frá Gunnari Justinussen og Rúna Lindberg.

Hesum boða nýggju eigararnir frá í tíðindaskrivi.

Framyvir verður Hendrik Egholm stjóri, og Christian Nagata nevndarformaður.

P/F Bilasølan, sum heldur til á Vegnum Langa í Hoyvík, umboðar Audi, Volkswagen, Skoda og Mazda. Umframt mekaniskan verkstað, eigur Bilasølan eisini plátuverkstaðin Prolakk. 30 fólk starvast á Bilasøluni/Prolakk. 

Hendrik Egholm hevur seinastu 13 árini verið stjóri í Magn, men fyrr í ár segði hann seg úr starvi. Christian Nagata eigur og rekur Sendistovuna umframt onnur feløg.