Hondbóltskapping í Vági rakt av koronasmittu

295 smittutilburðir eru nú staðfestir í Føroyum, og verður sæð burt frá 32 koronasmittaðum útlendingum, sum eru farnir úr Føroyum aftur, eru 70 fólk smittað í løtuni.

Ein teirra hevur í vikuni hjálpt til í sambandi við Faroe Islands Handball Cup í Vági. Tað sigur Bogi Mortensen, høvuðsfyrireikari, við Útvarpið. Feløg og foreldur hava fingið boð um støðuna.

Uml. 400 børn og ung luttóku í kappingini 4. og 5. august.

Smittaði persónurin kannaði seg, eftir at viðkomandi hevði verið í privatari veitslu í høvuðsstaðnum, har fleiri vórðu smittaði. Viðkomandi hevur arbeitt saman við fýra øðrum vaksnum, sum tó ikki hava fingið staðfest smittuna.