Hugskotskapping um nýggjan býarpart

Í gjár skrivaðu Annika Olsen, borgarstjóri, og Marin Katrina Frýdal, forkvinna í byggi- og býarskipanarnevndini hjá Tórshavnar kommunu, undir útbjóðingarskrivið fyri Stórutjørn. 

Tórshavnar kommuna bjóðar um somu leið til undangóðkenning til kapping um heildarætlanina fyri økið við Stórutjørn.

Seinastu árini hevur fólkavøksturin í Føroyum verið stórur, umleið 1,5 prosent um árið, og merkist fólkavøksturin serliga í høvuðsstaðarøkinum. Ein alsamt vaksandi býur krevur rúmari ræsur at liva og virka í. Tí er tørvur á at víðka um býin. 

Í hesum sambandi verður nú farið undir arbeiðið at skipa Stórutjørn í Hoyvík, økið norðanfyri Klingruna og vestan fyri býlingin Inni á Gøtu.

Lendisviðurskiftini, staðsetingin í mun til undirstøðukervið og bústaðardepil, íløgur í undirstøðukervið o.a. tala fyri, at Stóratjørn verður tann næsti býarparturin, ið farið verður undir at skipa.

Kappingin snýr seg um at finna besta uppskotið til eina heildarætlan fyri, hvussu blandað bústaðar- og miðstaðarbygging, t.e. handlar, stovnar, heilsubótarhøli og annað virksemi, ið hoyrir gerandisdegnum til, skal skipast í økinum. 

Ein stórhøll er samtykt at staðseta við Stórutjørn, ið skal kunna hýsa viðkomandi
ítróttargreinum, umframt stórum ráðstevnum, tónleikaframførslum og øðrum.

Umsitingin hjá Tórshavnar kommunu metir um innkomnum umsókirnar til undangóðkenning.

Freistin at søkja um undangóðkenning er 13. desember 2019 kl. 13.

Í mesta lagi fimm umsøkjarar sleppa víðari til kappingina um bestu heildarætlanina fyri Stórutjørn.

Kappingarskráin sæst her 

Marin Katrina Frýdal og Annika Olsen skrivaðu undir útbjóðingarskrivið í gjár