Hvussu framtíðartryggja vit vælferðarsamfelagið?

Nú arbeitt verður við ætlanum við at tryggja búskaparligt haldføri, skipar MEGD, sum meginfelag fyri 24 limafeløg hjá fólki, ið bera brek, fyri ráðstevnu, ið setir spurningin "Hvussu framtíðartryggja vit vælferðarsamfelagið?"

Ráðstevnan verður í Norðurlandahúsinum 29. september.

– Sera umfatandi royndir hjá heimsins londum og nýggj gransking vísa nevniliga neilig úrslit fyri samfeløg, bæði í mun til búskap og trivnað, um stýrt verður burturav við støði í BTÚ og peningarligum atlitum. Sum svar upp á hetta hava nógv lond kring heimin stovnað skipanir, ið tryggja, at almenn stýring fevnir “víðari enn BTÚ” til eisini at fevna um m.a. trivnað, rættindi og vælferð hjá børnum og ungum, eldri, og fólki, ið bera brek, skrivar MEGD í tíðindaskrivi.

– Høvuðsorsøkirnar til heimsumfatandi fíggjarkreppuna í 2008 vóru sambært millum øðrum Joseph Stiglitz, professara og nobelvinnara í búskaparfrøði, at lond áðrenn kreppuna ikki greinaðu og skipaðu búskap og politisk átøk víðari enn BTU, og at hetta ikki varð m.a. gjørt tvørgeiraligt og langtíðar, við støði í fjølbroyttum ávísum (indikatorum) innan m.a. trivnað og vælferð og í munagóðum samstarvi millum viðkomandi partar. Somu avbjóðingar gera seg galdandi í Føroyum, sum aðrastaðnis, eitt nú við starvsfólkatroti og fráflyting, er hetta týðandi evnið framvegis ikki veruliga sett á dagsskrá í Føroyum m.a. fyri at handfara avbjóðingar innan eitt nú trivnað, rættindi og vælferð hjá børnum og ungum, eldri, og fólki, ið bera brek.

– Arbeiðið hjá Stiglitz o.ø. hevur m.a. ført til hitt slóðbrótandi OECD Wellbeing Framework / Beyond GDP, sum í stuttum gevur londum møguleika at nýta viðkomandi amboð, tól, pallar o.l. sum liður í stýring víðari enn BTÚ. Eisini er umráðandi vísa á, at umfatandi royndir og gransking vísa at lond gerast búskaparliga sterkari við at stýra víðari enn BTÚ. Hetta kann eisini vera við til at tryggja at ætlanir um at tálma ella spara í almennum útreiðslum ikki heldur endar við øktum almennum útreiðslum, umframt vera við til at loysa framtíðar búskaparligar og sosialar avbjóðingar í føroyska samfelagnum, sum í stóran mun eru demografiskar, og helst krevja miðvísar, langtíðar og tvørgeiraligar loysnir innan trivnað og menning, m.a. fyri at fáa ung at støðast og koma heimaftur, fyri trivnað og menning hjá fólk við breki og fyri eldri og avvarðandi teirra.

Ráðstevnan  verður, sum áður nevnt 29. september, frá klokkan 9-12.30 í Norðurlandahúsinum, og verður eisini stroymd á netinum.

Á skranni verða:

• Romina Boarini, Stjóri í OECD Centre on Well-Being, Inclusion, Sustainability and Equal Opportunity (WISE),
• Majbritt Skov, Partnari í Deloitte Denmark og Head of Deloitte Economics, og
• Johnny í Grótinum, Formaður í Búskaparráðnum,
• Merita Mesiäislehto, leiðandi granskari í Finnish Institute for Health and Welfare (THL)

Beinir Johannesen, løgmaður, setur ráðstevnuna, og eftir framløgurnar verður pallborð við Margit Stórá, landsstýriskvinnu í almanna- og bústaðarmálum, Bárði á Lakjuni, landsstýrismanni í mentamálum, Eyðdis H. Niclassen, landsstýriskvinnu í heilsumálum, og Ásu Olsen, forkvinnu í MEGD.

Bjørt Samuelsen verður orðstýrari, og Betri Stuðul er høvuðsstuðul, skrivar MEGD.

Á tiltakinum verður atkoman sett í hásæti, og verða m.a. skrivi- og teknmálstulkar, týðing úr føroyskum í enskt og úr enskum í føroyskt.

Tiltakið verður ókeypis, men vegna avmarkað pláss er tó neyðugt at tekna seg til tiltakið, og verður hetta gjørt á heimasíðuni hjá MEGD.