India og ES hava gjørt handilsavtalu

ES og India eru komin ásamt um eina stóra handilsavtalu, ið væntandi fer at økja samhandilin munandi millum Evropa og heimsins fólkaríkasta land, India.

Tað upplýsir forsætisráðharrin í India, Narendra Modi, í dag.

Sagt verður, at henda avtala verður tann størsta av sínum skal, ið nakrantíð er gjørd.

- Avtalan fer at skapa ovurstórar møguleikar fyri tey 1,4 milliardir fólkini í India og fyri nógvar milliónir av fólkum í Evropa, segði Modi.

ES-nevndarforkvinnan, Ursula von der Leyen, og Narendra Modi fara væntandi seinni í dag at greiða nærri frá handilsavtaluni á einum tíðindafundi í indiska høvuðsstaðnum, New Delhi, skrivar Reuters.