Ivast í um alt verður etið

Man tað vera so, at tað eru millum 20.000 og 25.000 føroyingar, sum eta trý til fimm kók av grind um mánaðin?

Ein, ið ivast, er fólkalívsfrøðingurin Bartal Kamban. Hann hevur hugt nærri at tølunum yvir grindahvalir, sum verða hildnir til í Føroyum. Og úrslitið fær hann at ivast í, um vit yvirhøvur eta alt tvøstið og spikið, sum kemur til høldar.

- Et trúgvi ikki, at vit eta upp, sigur fólkalívsfrøðingurin í einum skrivi hann hevur almannakunngjørt.

Sí lesarin.fo: Vit eta ikki upp - hvalaveiðan í Føroyum má endurskoðast! 

Bartal Kamban hevur roknað seg fram til, vit fáa umleið 400 tons av grind um árið. Tað er 7,3 kilo av tvøsti og spik pr íbúgva, svarandi til 0,6 kilo um mánaðin.

Men tað er langt frá øll, sum eta grind, eitt nú tí tað verður frámælt av heilsumyndugleikunum.

Siga vit, at millum 20.000 og 25.000 føroyingar eta grind javnan, so verður tað til millum 1,3 og 1,7 kilo um mánaðin, ella trý til fimm kók.

Tað heldur fólkalívsfrøðingurin ljóðar í meira lagi. Hann ávarar móti at drepa óneyðuga nógvan hval, og mælir tí til at endurskoða skipanina. Ovurnýtsla og grammleiki er aldrin gott.

Tølini, sum nýtt eru í hesum útrokningunum, eru uttan teir 1428 springararnar, sum løgdu beinini í Skálafirði um vikuskiftið.