Jólamaðurin fyrstur á mál í báðum endum

Tey sum gingu í Sandoyartunlinum av Gomlurætt til Traðardal í dag fingu eitt yviraskilsi, tá Jens Mortan Rasmussen kom rennandi ímóti teimum sum jólamaður.

Hann hevði nevniliga súkklað av Gomlurætt, og komin á mál í Traðardali smoygdi hann sær í jólamannabúna, og so var hann klárur at renna yvir um aftur.

Jens Mortan Rasmussen kemur upp í Traðardali sum tann fyrsti (Mynd: Jens Kr. Vang)

Jens Mortan Ramsussen var fyrstur ígjøgnum við súkklu við tíðini 20 minuttir og 58 sekund. Rennitúrurin heim aftur á Gomlurætt tók 1 tíma og 7 minuttir.

Umleið 2000 fólk luttóku í tunnilsrenningini. Til bar at súkkla, renna og ganga teinin sum er knappar 11 kilometrar.