Katla Heðinsdóttir vart ph.d. á Københavns Universiteti

Í dag, hósdagin 30. september, vardi Katla Heðinsdóttir ph.d.-ritgerð sína við Institut for Kommunikation á Københavns Universiteti.  

Heimasíðan gransking.fo skrivar, at verjan gekk sera væl, og metingarfólkini spardu ikki uppá lýsingarorðini: Framúrskarandi, frálíkt filosofiskt arbeiði, sera týðandi gransking. Ein av próvdómarunum endaði við at bjóða henni við í ein granskingarbólk í Oslo.

Verkætlanin hjá Katlu snýr seg um úrnýtslu og viðbrekni í kliniskari gransking við denti á gransking í fíggjarliga viðkvomum umhvørvum. Heitið á ritgerðini er: “On the Exploitation of Host Communities in International Clinical Research."

- Granskingin hjá Katlu Heðinsdóttier er partur av stórari granskingarverkætlan við heitinum “Convergent Ethics and Ethics of Controversy - (CEEC)” har fleiri granskarar kanna alment ivasemi mótvegis nýggjari biotøkni úr etiskum, sálarfrøðiligum og politiskt-filosofiskum sjónarhornum. 

Klemens Kappel, professari á Københavns Universitet, hevur verið høvuðsvegleiðari og Erik Malmqvist, lektari á Göteborgs Universitet, hjávegleiðari.