Knappar 50.000 krónur fyri at gifta fólk

1.248 krónur fyri at gifta eitt par. Tað er tað, sum borgarstjórin í Havn og býráðslimir annars fáa í samsýning.

Borgarstjórin í Havn, Heðin Mortensen, vígdi í fjør 39 pør, og tað gav honum 48.672 krónur afturat føstu mánaðarlønini.

Hetta vísir innlit, sum Frihedsbrevet.fo hevur fingið.

Upphæddin upp á 1.248 krónur svarar til upphæddina, sum er ásett í sáttmálum fyri tænastu menn fyri fundir, sum eru millum tríggjar og fimm tímar langir.

Umframt Heðin Mortensen, fingu býráðslimirnir Annfinn Brekkstein, Jákup Dam og Bjørg Dam ávikavist 3.744, 2.496 og 1.248 krónur fyri brúðarvígslur í 2022, skrivar Frihedsbrevet.fo.

Í Klaksvíkar kommunu og í Runavíkar kommunu verður hetta mett at vera partur av arbeiðinum, og tí fáa borgarstjórarnir har ikki nakað afturat fyri at gifta fólk.