Ingi Samuelsen
Vandi er fyri, at kommunurnar verða noyddar til at lata tey flestu kommunalu endurnýtslu- og bingjuplássini aftur.
Tað sigur Kommunufelagið í einum hoyringssvari til ætlaðu kunngerðina um burturkast, sum Umhvørvismálaráðið arbeiðir við at fáa sett í gildi.
Kommunufelagið kann á ongan hátt góðtaka, at kommunali geirin – bæði IRF og kommunurnar hvør sær, samanlagt skulu gera íløgur fyri tíggjutals milliónir krónur í innsavning, móttøku og handfaring av burturkasti. Eftir øllum at døma uttan so mikið, sum at ein króna verður játtað frá landinum til endamálið.
- Við øðrum orðum skulu kommunurnar rinda fyri umhvørvispolitikkin hjá landinum, og tøkkin til borgaran, sum skal gjalda, er at kommunan sannlíkt steingir staðbundna endurnýtsluplássi, skrivar Kommunufelagið í hoyringssvarinum.
Kommunufelagið krevur tí, at landsstýrið alt fyri eitt støðgar hesi ætlan, og fær málið aftur á beint.
Krøvini, sum ætlanin er at seta kommununum eru so stór, at Kommunufelagið er sannført um, at fleiri av endurnýtsluplássunum fara at lata aftur.
- Hetta fær uttan iva eisini neiligar umhvørvisligar avleiðingar við tað, at fólk og fyritøkur í størri mun enn í dag fara at skaffa sær av við burturkastið á ólógligan hátt, skrivar Kommunufelagið.
Vinarliga broyt tínar kennifíla - og privatlívsstillingar fyri at síggja hetta innihald