Koyrdi 73 km/t í bygdum øki

Beint fyri klokkan eitt í nátt fekk løgreglan boð um, at eitt ferðsluóhapp hevði verið í Norðdepilstunlinum.

Talan var um eitt sonevnt soloóhapp, har ein motorsúkkluførari var dottin.

Hann fekk ongan álvarsaman skaða, men hann hevur møguliga brotið tummilin, sigur vaktleiðarin á politistøðini, sum leggur afturat, at talan var um ein óroyndan førara.

Motorsúkklan fekk eisini eitt sindur av skaða.

Í gjár var ein bilførari við Gøtugjógv eisini tikin fyri at koyra ov skjótt í bygdum øki.

Í bygdum øki er bert loyvt at koyra 50 km/t, og ferðin hjá honum var 73 km/t. Tað fær hann eitt klipp í koyrikortið fyri.

Neyðbluss stolið úr smábátum

Í gjár fekk løgreglan eisini tvær fráboðanir um innbrot.

Brotið varð inn í tveir smábátar, sum báðir lógu Undir Gøtueiði.

Í báðum førum hevði brotsmaðurin stolið neyðbluss umframt ymiskt annað.