Landssjúkrahúsið sett víðkaða pinkubarnascreening í verk

Farið verður nú undir at kanna allar nýføðingar fyri fleiri arvaligar sjúkur, í hava lutfalsliga stóran títtleika í Føroyum.

Hesum boðar Landssjúkrahúsið frá á heimasíðuni í dag.

Hetta er ein partur av nýggjari verkætlan, sum Katrin Eivindardóttir Danielsen, Phd, stendur fyri saman við ljósmøðratænastuni.

Av tí at føroyingar eru tætt skyldir, finnast ymsar arvaligar sjúkur í nógv størri lutfalli herheima enn uttalands. Ímillum sjúkur við høgum títtleika eru CTD, holocarboxylase syntetasu (HLCS) brek, cystisk fibrosa, og glykogen goymslubrek (GSDIIIa) – alt sjúkur, ið kunnu viðgerðast.

Endamálið við verkætlanini er við samtykki frá foreldrunum at kanna allar nýføðingar fyri hesar sjúkur komandi trý árini, so sjúkurnar kunnu staðfestast so skjótt sum til ber, og børnini kunnu setast í viðgerð.

Meira kann lesast á heimasíðuni hjá Landssjúkrahúsinum.