Ingi Samuelsen
Høgni Hoydal, landsstýrismaður við uttanríkismálum, heitir nú á Ísrael og Hamas felagsskapin í Gaza um at fáa vápnahvíld í lag.
So sigast kann, at inniliga áheitanin frá tiltøkum og undirskriftainnsavningum um at úttala seg um Gaza-kreppuna hevur givið úrslit.
Les: Áheitan um vápnahvíld við 600 undirskriftum handast løgmanni
“Fráboðanin viðvíkjandi støðuni í Ísrael og Gaza” er í dag løgd út á heimasíðuna hjá Uttanríkis- og vinnumálaráðnum.
Upp á fyrispurning frá Portalinum um føroyski sendimaðurin í Ísrael hevur fingið boð um at senda áheitanina til viðkomandi myndugleikar í Miðeystri og um fráboðanin er send út til onnur enn á egna heimasíðu, svarar Herálvur Joensen, aðalsrjóri í Uttanríkis- og vinnumálaráðnum.
“Fráboðanin er løgd á heimasíðuna (á føroyskum) og ein styttri ensk útgáva er send út á X (Twitter)”.
Her síggjast boðini á Twitter:
FM Høgni Hoydal: Upholding int'l law & protecting civilians in war is vital. Faroe Islands call for ceasefire, hostage release & unimpeded humanitarian access in Gaza, but lasting peace requires a two-State solution where Palestine’s statehood is recognised by all relevant States pic.twitter.com/EwWHWI4Jtf
— The Government of the Faroe Islands (@Tinganes) December 18, 2023
Fráboðanin á heimasíðuni hjá Uttanríkis- og vinnumálaráðnum er soljóðandi:
Fráboðan viðvíkjandi støðuni í Ísrael og Gaza
Tað er ein ófatiligur sorgarleikur, vit síggja í Gasa og Ísrael. Føroyar hava áður fordømt ræðuliga álopið frá Hamas á Ísrael og drápini á ísraelsk sivilfólk 7. oktober í ár. Føroyar viðurkenna rættin hjá Ísrael at verja seg og at taka stig fyri at forða fyri eini endurtøku av óunniliga álopinum hjá Hamas. Men hetta skal fara fram í samsvari við altjóða lóg, herundir humanitera lóg. Ein ræðuleiki rættvísger ikki ein annan. Líka so skakað, sum vit vóru av hendingunum tann 7. oktober, líka so óunniligt er tað at síggja og hoyra um oyðileggingar og stóra talið av sakleysum deyðum í Gasa – harímillum børn og kvinnur. Vápnahvíld má tí fáast í lag beinanvegin og allir gíslar eiga at verða treytaleyst latnir leysir.
Altjóða lóg er einasti vegur at skapa frið og framtíð hjá fólki, heruppií altjóða reglur um krígsførslu og verju av rættindum hjá sivilum fólki í krígsstøðu. Sum partar í vápnaðum stríði mugu Ísrael og Hamas halda altjóða og humanitera lóg, við at taka øll neyðug stig til tess at verja sivil og sivilt undirstøðukervi og virksemi. Humanitera støðan í Gasa er syndarlig, og hjálp má sleppa ótarnað fram til neyðstødd. Samstundis má virkast av øllum alvi fyri varandi friði millum partarnar.
Fortreytin fyri friði er ein loysn við tveimum ríkjum. Samstundis sum Ísrael brúkar rættin at verja seg, mugu palestinar í Gasa og á Vestara áarbakka fáa betri kor at liva undir og tilsøgn frá øllum viðkomandi pørtum um eina viðurkenning av Palestina sum ríki.
Høgni Hoydal
landsstýrismaður í uttanríkis- og vinnumálum
Vinarliga broyt tínar kennifíla - og privatlívsstillingar fyri at síggja hetta innihald