Ligið í rommtunnum í níggju mánaðar

Nú tað stundar til jóla er Okkara komin við eini serstakari serøl við íblástri úr gomlu munkaølini. “Ein øl, sum hóskar sera væl til jólaborðið”, sigur Petur Petersen, stjóri í Okkara.

Nýggja ølin kallast No. 6 - Okkara Brandan. “Tað serstaka við hesari ølini er, at hon hevur ligið í rommtunnum í 9 mánaðar; nakað, sum gevur henni ein serstakan smakk av rommi og træi,” greiðir Petur frá.

Hóast ølin er gjørd við íblástri úr belgiskari munkaøl, so er No. 6 eisini serstøk føroysk. “Vit nýta poknugrót úr føroysku náttúruni. Tað verður karamelliserað í urtum og lagrað saman við ølini, og hetta gevur karamellsmakk og mineralir til ølina.” 

No. 6 er ein sterk serøl við 11,5%, og sterkar ølir skulu helst njótast við 8-10 hitastigum heldur enn kaldar. “Serølin hóskar seg serliga væl til ræst kjøt og ost, og tí er No. 6 eitt gott boð til matin nú á jólum,” sigur Petur og leggur skemtandi afturat, at hon eisini hóskar seg væl undir jólatrænum.