Løgreglan: Púra friðarligt bæði í Havn og í Klaksvík

Seinasta samdøgrið hevur sum heild verið friðarligt, upplýsir løgreglan.

Í høvuðsstaðnum vóru ikki nógv fólk í býnum, men nógv fólk høvdu leitað sær til Klaksvíkar í sambandi við Sjómannadagin, og har gekk eisini alt friðarliga fyri seg.

Í Havn vórðu tveir mans tó skuldsettir fyri brot á skilhaldsreglurnar í sambandi við bardaga, og eisini varð ein bilførari tikin fyri at koyra ávirkaður av rúsdrekka. Í Klaksvík var ein illstøða, har løgreglan mátti leggja seg uppí, men tað bleiv ikki til nakað mál, sigur vaktleiðarin á løgreglustøðini í Havn.