Lond avmarka nýtsluna av videotænastu

Fleiri lond hava valt at avmarka nýtsluna av video tænastuni Zoom, ið kring allan heim verður nýtt av skúlum og arbeiðsplássum í koronakreppuni. Millum annað verður Zoom nýtt til undirvísing á Fróðskaparsetrinum.

Tænastan verður nýtt til eitt nú, at hava fundir og undirvísing, nú man ikki kann hittast.

Singapor boðar fríggjadagin frá, at lærarar í landinum ikki longur kunna nýta Zoom. Tað kemur eftir “fleiri álvarsamar hendingar” boðar undirvísingarráðið í landinum frá.

Í Singapor eydnaðist tað eitt nú nøkrum fremmandum monnum, at ritað seg inn á ein undirvísingartíma í landafrøði har ungar gentur luttóku. Menninir vístu óhóskandi myndir, og komu við vanvirðiligum viðmerkingum.

“Hetta eru nakrar álvarsamar hendingar. Undirvísingarráðið kannar nú brotið á trygdina og fyrireikar eina melding” sigur Aaron Loh frá tøkniligu deildini hjá ráðnum.

Eisini í Týsklandi og Taivan eru innførdar avmarkingar móti Zoom. Í Týsklandi bera tey ótta fyri data trygdini.

Zoom boðar í úttalilsi frá at “tænastan skuldarbindur seg, at bjóða ein vísan og tryggan pall”.

Tænastan hevur harafturat sett seg í samband við fyrrverandi trygdarovastan hjá Facebook Alex Stamos í eini roynd at betra um trygdina.