Lyfta Vágsbotn upp á eitt hægri støði

Er tað upp til formannin í Byggi- og býarskipanarnevndini í Tórshavnar Býráð, so skal Vágsbotnur sum uppihaldsøki lyftast upp á eitt hægri støði í framtíðini. Verandi loysn við træbygningi er bert ein fyribils loysn sigur Tróndur Sigurðsson við ÚF. 

Hann heldur, at ein framtíðar varandi loysn fyri alt økið skal byggja á hægri góðsku, og hetta er nakað, sum býráðið fer at umrøða. Sjálvur heldur hann tað var rætt at gera eina fyribils loysn, sum hevur virkað sera væl í summar við nógvum góðum tiltøkum. Peningurin, sum higartil er vorðin brúktur til at menna økið í Vágsbotni, hevur verið væl brúktur, eisini hóast hetta ikki er ein endalig loysn fyri økið.

-Tað manglar kvalitetur í einum býarrúmi sum tað í Vágsbotni, ið øll kunnu vera errin av, sigur Tróndur Sigurðsson við Útvarpið.

Portalurin vitjaði  á staðnum til seinasta matmarknaðin á torginum í Vágsbotni fyri ólavsøku, har føroyskar stuttfluttar matvørur vórðu til keyps. Nakrar dagar seinni var eisini føroyskur harmonikutónleikur á Torginum. 

Nú nýggja Havnará setir sín serstaka dám á býin, ynskja býráðslimir, at tað sama skal henda í Vágsbotni. 

Myndir Jan Müller