Magnus Müller er nú tekniskur leiðari í Vestmanna

- Tekniska økið er tað mest umfatandi økið hjá kommununi, og nú stórar verkætlanir liggja fyri framman hevur bygdaráðið valt at víðka og styrkja um toymið við at seta ein leiðara.

Soleiðis skrivar vestmanna.fo á heimasíðu sínari, nú kommunan fyri fyrstu ferð í  átta ár fer at hava ein tekniskan stjóra í starvi. 

Magnus Müller er 34 ára gamal. Hann er úr Vestmanna og útbúgvin byggifrøðingur. Magnus hevur seinastu árini arbeitt hjá J&K, og er hann í løtuni byggileiðari av stóru útbyggingini av Vága Floghavn.

- Vestmanna kommuna kennir væl til nakrar av teimum førleikum, sum Magnus hevur, tí hann hevur gjørt ymisk arbeiðir fyri kommununa, m.a. hevur hann teknað og projekterað útbyggingina av ítróttahøllini, sum er í gongd í løtuni.

Magnus Müller er eisini sum kendur hondbóltsspælari hjá VÍF.

Heimasíðan hjá Vestmanna kommunu vísir samstundis á, at Magnus kennir somuleiðis til nøkur av teimum arbeiðum, sum kommunan er í holt við og fer í holt við komandi tíðina.

Tað verður  nú undir hansara leiðslu, at hesar verkætlanir skulu fremjast og førast út í lívið

Magnus Müller byrjar í starvinum 1. oktober.