Marcus og Martinus til Føroya í september

Norsku stjørnurnar Markus og Martinus koma til Føroya at hava konsert í Høllini á Hálsi 28. septembur. 

Markus og Martinus eru møguliga størsta pop-duo í Skandinavia. Teir eru báðir 21 ár, tvíburar og koma úr Noregi. Teir blivu kendir, tá teir vunnu barna melodi grand prix í 2012, og hava síðan tá vunnið hjørtu kring heimin.

Tvíburarnir eru vaksnir upp í einari musikalskari familju, og byrjaðu í barnakóri sum fýra ára gamlir. Tað var í sambandi við eina familjuferð í Tailandi, at tað bleiv lagt merki til teirra serligu evni innan tónleikin, tá ein framførsla var á hotellinum har familjan búði á ferðini. Tónleikarin sum hevði framførsluna, spurdi millum áskoðararnar, um nakar hevði hug at koma upp á pallin at syngja. Tá vóru Markus og Martinus kvikir, fóru upp á pallin, og tvær stjørnur vórðu skaptar.

Millum áhoyrararnar sat norskur tónleikari, ið eggjaði dreingjunum at melda seg til barna melodi grand prix í Noregi – eisini kent sum MGP.

Sum bert 10 ára gamlir skrivaðu Markus og Martinus sangin ‘To dråber vann’ og stillaðu upp í MGP. Teir gjørdu ikki mætari enn at vinna, og so byrjaði teirra tónleikaferð, ið hevur koyrt við fullari ferð líka síðan. 

Seinast hava vit sæð teir í Eurovision finaluni í mai í ár, har teir stillaðu upp fyri Svøríki.

Teir hava gjøgnum tíðina hitað upp fyri heimsstjørnuna Jason Derulo, hava selt út stór konsertstøð uppá fáar minuttir og framført til handanina av Friðarheiðursløn Nobel’s. Sangur teirra ‘Elektrisk’ er tann mest stroymdi norski sangurin nakrantíð, og hevur hetta ført við sær, at teir hava fjepparar kring allan heim – bæði børn, ung og vaksin. 

Teir hava hava seinastu 10 árini verið á konsertferð kring alt Evropa, og nú koma teir til Føroya, í Høllina á Hálsi 28. septembur. 

Atgongumerki verða sett til sølu fyri serprís í eitt samdøgur, fyri 350 krónur nú klokkan 11 í dagá www.ebillett.fo. Eftir hetta hækkar prísurin uppá 450 krónur.