Metstór upphædd hjá Team Rynkeby

- Trygvi Kallsoy, liðskipari, handaði Fríðhild Højgaard frá Hjartabarninum kekkin við upphæddini, sum er 1.715.000 krónur. Ikki bara er hetta metstór upphædd hjá Team Rynkeby Føroyum, men hetta er størsta upphædd, sum eitt lið hjá Team Rynkeby nakrantíð hevur savnað. Stuðulin fer í ein grunn, sum Krabbameinsfelagið umsitur vegna Team Rynkeby Føroyar. Hesin grunnur stuðlar hjarta-, lunga- og krabbabørnum og teirra familjum. Børnecancerfonden, sum hjálpir føroyskum børnum, ið mugu til Danmarkar í viðgerð, fær eisini part av stuðlinum.

Í ár vóru tveir súkklarar á liðinum búsitandi í Grønlandi, og tískil letur Team Rynkeby Føroyar eisini pening til grønlendska krabbameinsfelagið seinni í mánaðinum, tá ið stór innsavning verður har.

- Vit í Team Rynkeby Føroyar eru ovurfegin um og ómetaliga takksom fyri stóra áhugan millum fyritøkur, kommunur, skúlar, dagstovnar og onnur, sum trúføst og gleðiliga stuðla okkara søk. Serliga hugaligt hevur verið, at børn hava skipað fyri stuðulstiltøkum og hava latið Team Rynkeby nógvar tíggju túsund krónur. Vit gleðast um at lata peningin til børn, sum stríðast við sjúku, sorg, sakn ella hava sinnisligar avbjóðingar.