Næmingar við serligum tørvi sendir til hús

Orsakað av verkbanninum hjá námsfrøðingunum, hava skúlarnir verið noyddir at sent næmingar við serligum tørvi til hús, sigur Jónleif Johannesen, formaður í Skúlaleiðarafelagnum.

Í gjár vórðu limir hjá Pedagogfelagnum, ið starvast innan fólkaskúlan, forskúlar og frískúlar í 24 tímar verkfalli. Verkfallið skuldi vara frá mánamorgunin klokkan sjey til í morgun klokkan sjey, men Fíggjarmálaráðið og Kommunala arbeiðsgevarafelagið lýstu verkbann.

Verkbannið er galdandi fyri allar limir hjá Pedagogfelagnum, sum starvast innan fólkaskúlan, forskúlar og skúlanum á Trøðni, og sum Pedagogfelagið hevði koyrt í verkfall.

– Tað er ein sera óheppin støða, og vit eru sera hørm um, at vit eru tikin til gíslar í eini trætu, sum vit einki eiga í, segði formaðurin í Skúlaleiðarafelagnum við Útvarpið.

Á eitt nú Skúlanum á Trøðni eru tey sera hart rakt av verkbanninum.

– Uml. helvtin av undirvísarunum hjá okkum eru námsfrøðingar, og teir næmingarnir, sum hava námsfrøðingar kunnu ikki koma í skúla, tí har er eingin at taka sær av teimum, sigur Jan Christiansen, skúlastjóri í viðmerking til Portalin.