Tíðindaskriv
Í nettrygdarætlanini, sum landsstýrismaðurin í Uttanríkis- og vinnumálum legði fram herfyri, fær Vinnustovnurin ein týðandi og virknan leiklut í at verja samfelagstýðandi kt-undirstøðukervi.
Dømi um samfelagstýðandi kt-undirstøðukervi kunnu vera streymveiting, fjarskifti, læknahjálp, røkt, radiosendikervið, pengaflutningur, flutningur á landi, sjógvi og loftvegis, skattainnkrevjing, tinglýsing, skipaskráseting o.s.fr.
Um hesar, og aðrar týðandi skipanir, ikki virka, verður virkisførið í landinum munandi skert, og tá kunnu bæði mannalív og stór virði vera í vanda.
Nøkur av fyrstu átøkunum í nettrygdarætlanini eru tí neyvari at kortleggja samfelagstýðandi kt-undirstøðukervi og at skipa eina nøktandi tilbúgving, til tess at styrkja mótstøðuførið móti nettrygdarvandum.
Fyri fyrst er økið raðfest við áleið einari millión krónum. Henda játtanin er ætlað til at byrja arbeiðið, m.a. at fyrireika eina nettrygdarlóg, men neyðugt verður at økja játtanina munandi í næstum.
Uttanríkis- og vinnumálaráðið
Vinarliga broyt tínar kennifíla - og privatlívsstillingar fyri at síggja hetta innihald