Nógv ákoyrd djór

- Tað er als ikki óvanligt; tað er so at siga hvønn dag, at onkur ringir inn um hetta. 

Soleiðis sigur vaktleiðarin á løgreglustøðini í høvuðsstaðnum um tað at fáa fráboðanir um djór, sum eru yvirkoyrd.

Hann staðfestir tó, at seinasta samdøgrið vóru óvanliga nógvar fráboðanir. Talan var um fimm ákoyrd djór á ymiskum støðum.

Fráboðanirnar komu úr Kollafirði, Kvívík, Runavík og úr Vági. 

Hetta vóru millum annað seyðir, sum ganga leysir og ymsastaðni, har teir ikki burdu verið.

Í mun til mál á vegnum, so kundi vatkleiðarin eisini greiða frá, at tveir bilførarar fingu bót og klipp fyri at koyra ov skjótt á einum strekki tætt við Sandavág í gjárkvøldið.

Ein koyrdi 107 kilometrar um tíman, og ein annar koyrdi 108 km/t.