Innanlands

Nýggj frágreiðing: Føroyar á gáttini til WTO

Hetta kann blíva inngangurin til ein nýggjan kapittul um leiklutin hjá Føroyum á heimspallinum, sigur Sjúrður Skaale, nú Javnaðarflokkurin á Fólkatingi gevur út nýggja frágreiðing um føroyskan limaskap í heimshandilsstovninum WTO

Hetta kann blíva inngangurin til ein nýggjan kapittul um føroyskan uttanríkispolitikk og leiklutin hjá Føroyum á heimspallinum, sigur Sjúrður Skaale, fólkatingsmaður (Savnsmynd)

Hetta kann blíva inngangurin til ein nýggjan kapittul um føroyskan uttanríkispolitikk og leiklutin hjá Føroyum á heimspallinum, sigur Sjúrður Skaale, fólkatingsmaður (Savnsmynd)

2025-05-10 16:51 Author image
Tíðindaskriv
placeholder

Hví er sjálvstøðugur limaskapur í WTO so týdningarmikil fyri Føroyar? Hvat er WTO yvirhøvur fyri nakað, og hvat skal til fyri at fáa limaskap?

Hesir spurningar verða millum annað viðgjørdir í nýggju frágreiðingini ”Føroyar á gáttini – vegurin til WTO”, sum Javnaðarflokkurin á Fólkatingi júst hevur givið út.

Við hesi frágreiðing hevur Javnaðarflokkurin á Fólkatingi sett sær fyri at lýsa eitt uttanríkispolitiskt mál, sum politiska skipanin í Føroyum hevur tosað um í nógv ár, men sum er endað sum ein løgfrøðilig træta millum Føroyar og Danmark, ið hevur forðað Føroyum í at søkja um limaskap.

Men nú eru glottar at hóma, tí ein serlig nevnd er sett, ið skal taka støðu til, um sjálvstøðugur føroyskur limaskapur er møguligur innan fyri karmarnar í donsku grundlógini. Hetta verður gjørt við støði í grein 6 í heimastýrislógini.

Sjúrður Skaale, fólkatingsmaður, kallar málið fyri prinsipielt, stórt og søguligt. Nettupp tí heldur hann tað vera týdningarmikið at lýsa málið væl, so fleiri kunnu skilja týdningin av limaskapi WTO.

– Hetta er søguligt á tann hátt, at vit spreingja karmin í heimastýrislógini, sum bleiv settur í 1948. Karmurin er víðkaður og víðkaður gjøgnum árini, men hesu ferð verður hann sprongdur, um tað eydnast at fáa limaskap, sigur hann.

– Hetta kann blíva inngangurin til ein nýggjan kapittul um føroyskan uttanríkispolitikk og leiklutin hjá Føroyum á heimspallinum, sigur Sjúrður Skaale.

Frágreiðingin fæst sum bóklingur, men kann eisini lesast í fullari longd á heimasíðuni hjá Javnaðarflokkinum á Fólkatingi, her.

Javnaðarflokkurin á Fólkatingi

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder