Per Martin toppskorari í Eysturkommunu

Í Eysturkommunu fóru tey hesaferð partvíst frá politiskari uppstilling til kommunuvalið hesaferð.

Fólkafloks- og tjóðveldisfólkini savnaðust í einum borgaralista, Lista V, og hesin listin fekk nógv flestar atkvøður á valinum hesaferð. 870 atkvøður gav seks limir í bygdarráðnum, sum komandi fýra árini skal húsast í Føroya vakrasta ráðhúsi í Norðragøtu.

Og ungi fiskaseljarin og Víkingafjepparin, Per Martin Gregersen gjørdist toppskorari við 122 atkvøðum. Hini valdu á borgaralistanum eru :

Magnus Skoralíð 118
Petur Súni Jacobsen 105
Katrin Kjartansdóttir 90
Marjun Andreasardóttir 88
Hjalti Dalheim 79

Hanna Jensen, sum stillaði upp á listanum hjá Framsókn seinast, stillaði hesaferð upp á lista Á við heitinum Áfram. Listin fekk 330 atkvøður og tvey vald. Hanna Jensen varð afturvald við 101 atkvøðum saman við Rúna Justinussen við 78.

Bert Javnaðarflokkurin stillaði sostatt upp á politiskum lista. Javnaðarlistin fekk tvey umboð seinast, men bert eitt umboð hesaferð. Vald varð Marita Klein Joensen við 54 persónligum atkvøðum.