Prísskipanin hjá Dennisi Holm verður vrakað

Ætlanirnar um prísskipanina sum Dennis Holm, landsstýrismaður í samferðslumálum, legði fram herfyri, verður broytt. Tað sigur løgmaður við útvarpið.

Karlot Hergeirsson hótti fríggjadagin við at leggja misálit fram móti Dennis Holm, landsstýrismani. Tingmaðurin hjá Framsókn var ónøgdur við nýggu prísskipanina hjá Strandferðsluni, sum Dennis Holm hevur lagt fram.

- Ein ávís misnøgd hevur verið í samgonguni. Tí hava vit valt at hyggja eftir hesum einaferð afturat, fyri at tryggja at øll sum eru partur av samgonguni kunnnu vera glað fyri prísskipanina sum verður hjá Strandferðsluni í framtíðini, sigur Aksel V. Johannesen, løgmaður.

Landsstýrismaðurin í samferðslumálum fer í morgin at hava fund við samgonguumboðini í vinnunevndini um málið.