Putin og Macron til reiðar at fundast

Evropa eigur at samskifta við russiska forsetan, Vladimir Putin fyri at royna at fáa ein enda á í krígnum í Ukraina.

Tað segði franski forsetin, Emmanuel Macron fyrr í vikuni, og í dag verður sagt úr Russlandi, at Putin er opin fyri at tosa við franska forsetan.

Macron er somuleiðis til reiðar at fundast við Putin, sigur franska forsetaembætið sambært Ritzau.

– Tað er kærkomið, at Kreml (russiska stjórnin, red.) alment er sinnað at fara undir hesa tilgongd. Komandi dagarnar verður avgerð tikin um, hvussu vit kunnu halda fram herfrá, verður sagt í fráboðanini.

Hetta vikuskiftið fundast umboð fyri Ukraina, Evropa, Russland og USA í Miami í amerikanska statinum Florida.