Ræst á topp 10 yvir bestu matstovur í danska ríkinum

Tvær føroyskar matstovur eru millum tíggju tær bestu í Danmark. Tað avdúkaði matguidin White Guide Denmark á eini samkomu í Axelborg í Keypmannahavn í gjárkvøldið.

Koks í Ilimanaq í Grønlandi liggur á fjórða plássi eftir tær trýggjar heimsklassa matstovurnar í Keypmannahavn, Alchemist, Noma og Geranium.

Og so kemur Ræst í Gongini í Havn inn á tíggjunda plássið, beint eftir Søllerød Kro, har føroyingurin Jan Restorff er matstovuleiðari.

Og ikki bara fingu tvær føroyskar matstovur heiður og góð viðmæli. Meksikanski kokkurin á Ræst, Sebastian Jiménez, varð eisini kosin ársins nýggja kokkanavn, Årets unge Kokketalent.

Sebastian Jiménez (Savnsmynd: Neil Burger)

Í dømingini hjá White Guide verða givin upp til 40 stig fyri matin og upp í 100 stig fyri samlaðu upplivingina. Ongin matstova fær fult stigatal, men Alchemist, ið varð kosin besta matstovan er nær við, hon fær 39/99.

Noma fær 39/98 og Geranium 39/96, og síðan Koks við 38/97.

Á einum deildum 10. plássi koma  Ræst og nýggja koreanska matstovan Koan í Keypmannahavn, sum báðar fáa dømingina 37/93.

Hetta má sigast at vera eitt gott ummæli hjá Ræst, tí hvat matinum viðvíkur, so liggur føroyska matstovan á hædd við matstovurnar, sum deila 6. plássið og 8. plássið, meðan samlaða dømingin liggur eitt vet lægri.

Dómararnir skriva eitt umfatandi ummæli av øllum matstovunum, sum eru við í dømingini, og Ræst verður ummæld undir yvirskriftini “En kulturrejse i råddenskab og fortryllende velsmag”.

Í ummælinum verður víst á, at Ræst higartil hevur roynt seg við tí siðbundna føroyska matsiðinum, sum ikki fellur í smakk hjá øllum. Men við Sebastian Jiménez og royndum hansara frá Koks og tí latínamerikansku matmentanini hann hevur við sær, er Ræst vorðin ein spennandi matstova á altjóða støði. “Tað er siðvenja, nýhugsan og samanseting av mentanum í eini higartil ósæddari stórfingnari kombinasjón”

Les alt ummælið her, har tað eisini ber til at lesa ummælið yvir hinar føroysku matstovurnar, sum eru við í Whita Guide. Umframt Ræst og Koks eru tær Bitin, Fiskastykkið, Húsagarður, Katrina Christiansen, Roks, Ruts Restaurant, The Tarv og Áarstova.

Les eisini ummælið á Portalinum frá mars í ár, tá Ræst lat upp við nýggjum kokki og nýggjari matskrá: Ræst og eitt sindur speisi