Samdir um fleiri mál - enn kunnu samráðingarnar fara fleiri vegir

Javnaðarflokkurin, Sambandsflokkurin og Framsókn hava síðani seinnapartin samráðst. Flokkarnir samráðast um at skipa nýggja samgongu, og tað gongur eftir øllum at døma væl.

Aksel V. Johannesen, formaður í Javnaðarflokkinum og samráðingarleiðari, segði við Dag og viku í kvøld, at enn verður tosað yvirskiað um ymisk øki í samfelagnum fyri at vita hvar flokkarnir eru á hesum økjum.

- Tá hetta er liðugt, helst fyrrapartin í morgin, og um allir tríggir flokkarnir meta, at tað er grundarlag fyri at fara undir veruligar samráðingar, byrja vit í morgin, sigur Aksel V. Johannesen.

Einki er liðugt fyrr enn alt er liðugt, og tí er heldur ikki vist, at tað verður ein CBF-samgonga - Javnaðarflokkurin, Sambandsflokkurin og Framsókn. Nógv bendir á tað, hóast snávingarsteinar eru á vegnum.

- Allir tríggir flokkarnir eru samdir um nøkur mál. Aðrastaðni eru smærri snávingarsteinar og á onkrum øðrum øki eru størri snávingarsteinar, segði Aksel V. Johannesen.