Sverri Egholm
Hósdagin verður seinasta skotið latið av í Dalstunlinum. Í hesum sambandi skipar Landsverk fyri almennari hátíðarløtu við tunnilsmunnan í Dali kl. 15. Messingkvintettin K.Ó.J.A.K. spælir til hátíðarløtuna.
Tað verður Sigurd L. Lamhauge, stjóri á Landsverki, sum fer at bjóða vælkomin. Síðani verður tað Dennis Holm, landstýrismaður í Fiski- og samferðslumálum, sum fær orðið. Aftaná hann fer Símin Hannus Johannesen, varaborgarstjóri í Húsvíkar kommunu, eisini at bera fram eina heilsan.
Tá røðurnar eru hildnar fer Annfin Johannesen at trýsta á knøttin at skjóta seinasta skotið. Anfinn, sum er dalbingur, starvaðist sum maskinførari hjá Landsverki í góð 40 ár í tíðarskeiðinum 1973 - 2013. Ein av hansara uppgávum hesi árini var at halda bratta vegin til Dals opnan fyri kava.
Eftir at skotið er ígjøgnum, bjóðar Landsverk til kaffi og køku í gamla skúlanum í Dali. Øll eru vælkomin.
Fakta um Dalstunnilin:
Talan er um ein 2.200 metrar langan og 8 metrar breiðan tunnil. Umframt hetta skulu eisini gerast 150 metrar av vegi Húsavíkarmegin, og 100 metrar av vegi Dalsmegin. Síðan skulu umleið 2.500 metrar av vegi afturat breiðkast.
Vinarliga broyt tínar kennifíla - og privatlívsstillingar fyri at síggja hetta innihald