Seks tilburðir umborð á fraktskipi

Seks nýggir koronatilburðir eru staðfestir í dag, upplýsir Landslæknin.

Teir seks tilburðirnir byggja á úrslit frá kanningum, ið vórðu gjørdar umborð á fraktskipinum Cassiopea, sum seinastu dagarnar hevur ligið við síðuna av russiska trolaranum Karelia við bryggju í Ánunum í Klaksvík.

Øll manningin, sum telur 23 mans, varð kannað.

Eftir ætlan leggur Cassiopea leiðina til Afrika í dag. Hesum hevur Landslæknin tó mælt skiparanum frá at gera, sigur Heilsumálaráðið.

Fraktskipið Cassiopea (Mynd: Pól Sundskarð)

Landslæknin heitti í gjár á øll, ið hava havt samband við útlendsku manningarnar á teimum trimum skipunum, sum seinastu tíðina hava ligið við bryggju í Ánunum í Klaksvík, um at vísa serligt varsemi. Hann mælir í dag øllum teimum, ið hava havt samband við manningina um at lata seg kanna, sama um tey hava sjúkueyðkenni ella ei. Eisini skulu tey leggja stóran dent á halda frástøðu og hava gott reinføri.

Les eisini: Landslæknin hetir á fólk um at visa varsemi

Samlaða talið á tilburðum, sum eru staðfestir í Føroyum er nú komið upp á 220, og standa 32 fólk sostatt til at vera smittað í løtuni.

Tilsamans eru 36.125 kanningar gjørdar í Føroyum.

Dagførd kl. 17.54