Sjey bilførarar tiknir fyri at koyra ov skjótt seinasta døgnið

Løgreglan hevur verið nógv til staðar í ferðsluni seinasta døgnið og hevur tikið heili sjey bilførarar fyri at koyra ov skjótt.

 

Í gjár var løgreglan úti og gjørdi ferðslumátingar við Áir.

 

Fýra bilførarar vórðu tiknir fyri at koyra ov skjótt, og teir koyrdu allir millum 102-110 kilometrar um tíman, sum merkir bót og klipp í koyrikortið. Harafturat vórðu fýra bilførarar tiknir fyri at tosa í telefon, meðan teir koyrdu, og teir fingu tí bót. 

 

Tríggir bilførarar vórðu somuleiðis eisini tiknir í nátt fyri at koyra ov skjótt.

 

Tá gjørdi løgreglan ferðslumátingar Millum Fjarða, og tveir fingu klipp í koyrikortið fyri at koyra 107 kilometrar um tíman og 110 kilometrar um tíman. Triðji bilførarin koyrdi heili 117 kilometrar um tíman og fekk tí treytaða frádøming av koyrikortinum.