Skarv fyri seinastu ferð

Føroyska savningarstaðið í náttarlívinum í danska høvuðsstaðnum síðan 1975, hevur í kvøld opið á síðsta sinni.

Tað var í mars mánað, at boðað var frá, at Skarv letur aftur eftir næstan hálva øld í Pilestræde, nærhendis gongugøtuni Strøget.

(Savnsmynd)

Nógv er á skránni, nú dyrnar lata aftur. Frá klokkan 19 til 21 er móttøka, har øll eru vælkomin. Eftir hetta lata dyrnar alment upp, og fleiri framførslur eru á skránni. Á pallin fara Jens Marni Hansen, Uni Debess, Hans Petur í Brekkunum, Sámal Ravnsfjall, Johan Hentze og Danny Baldursson.

Skarv Bar varð stovnað av Daniel Peter Thorsteinsson í februar 1975, sum hann saman við konu síni Kirsten Thorsteinsson og partamanninum Arnfinn Thorsteinsson, hevur rikið til 2015. Í 2015 yvirtók dóttir hansara, Siri Thorsteinsson, Skarv Bar.

Korona, inflatión og manglandi inntøkur gera, at staðið ikki ber seg longur.