Skulu hava avloysara fyri Símun P. Jacobsen

Ein av føroysku prestunum, sum hevur verið í sínum starvi í langa tíð, er Símun Persson Jacobsen.

Presturin hevur virkað í Sjóvar Kirkju í nógv ár. Ein part av tíðini hevur hann eisini verið formaður í Kirkjuligu Heimamissiónini.

Í gjár skrivaði Fólkakirkjan á heimasíðu sínari, at vegna lestrarfarloyvi verður søkt eftir avloysara til tænastuna sum prestur í Sjóvar prestagjaldi.

Talan er um tíðarskeiðið 10. januar – 10. mai 2024. Tá verður Símun P. Jacobsen fyribils ikki í starvinum, sum hevur tær fýra kirkjusóknirnar: Selatraðar, Sjóvar, Skála og Oyndarfjarðar kirkjusókn.

Um umsøkjaran skrivar folkakirkjan.fo, at viðkomandi skal hava lokið prógv í gudfrøði og lúka krøvini, ið lóggávan annars setir fyri at gerast prestur í fólkakirkjuni í Føroyum.

- Umsøkjarar, ið ikki eru prestvígdir, senda saman við umsóknini váttan frá pastoralseminarium. Harafturat mega kandidatar, ið ikki er prestvígdir, hava lokið biskupspróvtøkuna innan 10. januar 2024.

Umsóknarfreistin er mikudagin 3. oktober.