Smábarnaforeldur í Vági sleppa undan ansingargjaldi í desember

Tey foreldur, sum hava børn í frítíðarsskúla, barnagarðinum og vøggustovuni hjá Vágs kommunu, fáa væntandi eina jólagávu frá býráðnum aftur í ár. Og tað er, at tey sleppa undan at rinda ansingargjald fyri desember mánað.

Barna og ungdómsnevndin samtykti einmælt í gjárkvøldið, at einki ansingargjald verður í jólamánaðinum.

Vágs býráð sigur í eini fráboðan, at í samband við at Vágs kommuna aftur hevur fingið væl meira inn í skatti í ár, eins árið frammanundan, verður einki ansingargjald kravt fyri jólamánaðin.

Inntøkurnar av skatti hava verið framúr góðar í ár, har Vágs Kommuna fer at hava nakrar milliónir krónu eftir í ár, enn mett var frammanundan, sigur Levi Mørk, formaður í barna og ungdómsnevndini.

- Sjálvandi skulu okur verja um okkara foreldur, sum hervið fáa ein litlan bata til jólar eins tey fingu í fjør. Okur vita jú at nógv er at gjalda í jólamánaðinum frammanundan, sigur Levi Mørk

Enn vantar tó ein viðgerð í fíggjarnevndini og síðan skal málið viðgerast í býráðnum seinni í mánaðinum. Í fjør var sama uppskot einmælt samtykt í býráðnum.