Smittan í Føroyum er framvegis avbyrgd

Tey bæði fólkini, sum í gjár vórðu funnin smittað við korona, hava ikki verið í sambandi við aðrar persónar í Føroyum.

- Smittan her á landi er tí framvegis avbyrgd. Tað segði Anette Lykke Petri, virkandi landslækni, við Kringvarpið í morgun.

Persónarnir hava báðir fingið staðfest smittuna meðan tey sótu báðir í sjálvbodnum sóttarhaldi.

Sambært landslæknanum fáa hesir tilburðirnir ikki myndugleikarnar til at broyta tilmælini viðvíkjandi korona.

- Tað hevur framvegis týdning at fylgja tilmælunum um at halda frástøðu, og taka boðini um at fara í sóttarhald í álvara, segði Anette Lykke Petri við útvarpið.