Spara umleið 20 milliónir - eisini broytingar hjá aðalstjórum

Ætlanin við niðurskurðinum í aðalráðunum er millum annað at spara fitt av peningini í almenna geiranum.

Byrjað verður á toppinum - við okkum sjálvum sum politikkararnir siga - og er hetta helst eisini tað rætta.

Ben Arabo, sum er formaður í nýskipanarnevndini, segði við Kringvarpið fyrrapartin, at talan er um eitt neyðugt stig: Tað er full semja í nýggju nevndini um, at talið av landsstýrisfólki og aðalráðum, við løgmanni og løgmansskrivstovuni, skal verða seks.

Í løtuni er talan um níggju aðalráð. Hetta eru 140 ársverk, sum kosta samanlagt 155 milliónir krónur - og tá verða sjálvi landsstýrisfólkini ikki tald við.

Ætlanin er, at broytingin, sum er kunngjørd í dag, skal syrgja fyri sparingum á 20 milliónir krónur yvir tíð. Tað tekur ikki tjúgu milliónir vekk 1. desember, tá broytingarnir koma í gildið, men um tað ikki hevði verið framt nú, hevði ávirkanin bert verið seinkað, sigur Ben Arabo.

Ben Arabo og hini í nevndini hava ikki verið so leingi til verka, men nú kemur fyrsta stóra broytingin longu (Savnsmynd: Jens Kr. Vang)

Trý fara frá - onnur verða flutt

Tað er ikki bert nakrir politikkarar, sum merkja sviðan av broytinginum. 

Bjarni Kárason Petersen (Løgmálaráðið), Djóni Nolsøe Joensen (Barna- og útbúgvingarmálið) og Jóhan Christiansen (Fiskivinnu- og samferðslumál) skulu úr sessunum 1. desember.

Nella Festirstein er í løtuni aðalstjóri í Løgmálaráðnum, og hon heldur ikki fram í politisku umsitingini.

Barna- og útbúgvingarmálaráðið heldur fram. Men uttan Djóna Nolsøe Joensen og uttan Poul Geert Hansen, sum áður hevur verið aðalstjóri í øðrum ráðum.

Almannamál og mentamál fara hvør sín veg, saman við ávikavist heilsumál og uttanríkismál, og Eyðun Mohr Hansen missir harvið sítt starv sum aðalstjóri í Almanna- og mentamálaráðnum.

Allir hinir aðalstjórarnir, uttan John Rajani og Bjarni Askham Bjarnason sum sjálvir eru í nýskipanarnevndini, fáa øðrvísi leiklutir. Millum annað fer Elin Mortensen úr gamla fiskivinnumálaráðnum yvir í Barna- og útbúgvingarmálaráðið.

Mynd: Løgmansskrivstovan

Tað er kortini als ikki vist, at øll tey almennu starvsfólkini í politisku umsitingini sita trygg. Flestu aðalráðini skulu skipast av nýggjum, og har kunnu broytingar koma.

Løgmansskrivstovan: 
Løgmaður: Aksel V. Johannesen
Løgmansstjóri: John Rajani

Uttanríkismál (við millum annað umhvørvismálum): 
Landsstýriskvinna: Sirið Stenberg
Aðalstjóri: Herálvur Joensen

Fíggjarmál: 
Landsstýriskvinna: Ruth Vang
Aðalstjóri: Bjarni Askham Bjarnason

Vinnumál - herundir fiskivinnumál: 
Landsstýrismaður: Eirikur í Jákupsstovu
Aðalstjóri: Pól Egholm

Barna- og Útbúgvingarmálaráðið: 
Landsstýriskvinna: Súsanna Bertholdsen 
Aðalstjóri: Elin Mortensen

Almanna- og heilsumál: 
Landsstýriskvinna: Margit Stóra
Aðalstjóri: Bjørgfríð Ludvig

Dagført: 15.59