Stórur samanstoytur í J.C. Svabosgøtu

Eitt ferðsluóhapp var í høvuðsstaðnum í gjár, sum hevði við sær stóran materiellan skaða men tíbetur ongan fólkaskaða.

Hesum boðar vaktleiðarin á løgreglustøðini í Havn frá í morgun. 

Tað var um 10-tíðina, at ein bilur fór á glið, tá hann kom um hornið á J.C.Svabosgøtu - tætt við Landssjúkrahúsi. Tað var hált og krapi.

Persónsbilurin fór yvir á hina koyribreytina og rendi frontalt inn í ein býarbuss. Talan var um rímiliga harðan samanstoyt, og serliga persónsbilurin fekk skaða, og kundi hann ikki koyra víðari.

Tað var annars lítið á døgnrapportini hjá løgregluni, men um midnáttarleitið fór almarurin á Sundsverkinum. Sløkkilið og onnur vóru skjótt til reiðar, men tað vísti seg, at talan var um okkurt mistak í skipanini - eitt slag av følskum alarmi. Har var eingin roykur ella eldur varð staðfest.

Vaktleiðarin kundi annars ikki siga nakað nýtt um støðuna hjá Kambi, men vísti til boðini frá MRCC í morgun um víðkaða leiting og vónaði, at veðrið fer at vera gott fyri at gera umstøðurnar betri. Tveir mans eru framvegis saknaðir.

Sí eisini: Leitiøkið blívur alsamt størri

Í mun til bjargingina í gjár, segði vaktleiðarin hjá løgregluni, at tað hevði gingið lutfalsliga væl og skjótt hjá tilbúgvingini: Tyrlan kom skjótt á staðið, og tá lent var á Suðuroynni høvdu Tvøroyrar kommuna og Landsverk gjørt sítt fyri at syrgt fyri, at skjótt var at koma til Suðuroyar Sjúkrahús, sum teir bjargaðu av skipunum vórðu førdir á.