Talið av smittaðum í Hetlandi trífaldað

Talið av coronasmittaðum í okkara nærmasta grannalandi, Hetlandi, trífaldaðist í gjár úr tveimum upp í seks.

Seinnapartin í gjár upplýstu skotsku heilsumyndugleikarnir, at talið av staðfestaðum smittaðum í Hetlandi nú var komið upp á seks.

Í øllum Skotlandi øktist talið í gjár úr 36 upp í 60.

Harvið eru lutfalsliga fleiri smittað í Hetlandi enn í nærmastu landslutunum niðri á skotska fastlandinum, skrivar Shetland News.

Á Orknoyggjum er ongin tilburður staðfestur enn, skrivar The Orcadian.

Í Hetlandi harmast tey tó meira í dag um, at hava fingið vitjan av einum útlendskum ferðamannaskipi, og um tað møguliga kann hava smittu við sær.

Talan er um 222 metra langa ferðamannaskipið Magellan. Havnamyndugleikarnir í Lerwick vissa um, sambært Shetland News, at ongin vandi er á ferð.

- Ferðafólkini eru skannað, og ongi tekin eru um, at coronasmitta er umborð, verður sagt.

Næsta ferðamannaskipavitjan í Hetlandi er Astoria, sum kemur 21. mars.