Tey reyð-grønu vunnu – Kristerson hevur lagt frá sær

Konservativi svenski forsætisráðharrin, Ulf Kristersson, hevur í dag sagt seg úr embætinum.

Tað kemur fram í einum brævi til Ríkisdagin, sum Kristersson sjálvur hevur lagt út á X.

- Nú er tað ríkisdagsformaðurin, sum skal standa á odda fyri næsta stiginum í tilgongdini at skipa nýggja stjórn. Fyri at tað kann henda skjótast gjørligt, biði eg hervið um at vera loystur úr mínum skyldum sum forsætisráðharri, stendur at lesa.

Ulf Kristersson, Moderatarne, er ikki longur forsætisráðharri (Mynd: Nicolas Tucat/AFP/Ritzau Scanpix)

Allar atkvøðurnar frá ríkisdagsvalinum eru nú taldar upp, og fyribilstølini vísa, at reyð-grøni blokkurin vinnur valið tepurt, skrivar svenska sjónvarpið.

Atkvøðurnar fella soleiðis:

Sosialdemokratarnir: 28,0
Moderaterna: 19,8
Sverigedemokraterne: 17,5
Vensterpartiet: 8,4
Centerpartiet: 7,0
Kristendemokraterna: 6,2
Miljøpartiet: 6,1
Liberalerna: 5,3

Hetta geva flokkunum í reyð-grøna blokkinum, Socialdemokraterna, Vensterpartiet, Centerpartiet og Miljøpartiet 49,5 prosent av atkvøðunum og 176 limir í ríkisdegnum, meðan borgarligi blokkurin fær 48,8 prosent og 173 limir.

Harvið verður tað Magdalena Andersson, forkvinna hjá sosialdemokratunum, sum nú skal skipa nýggja svenska stjórn.