Tók eina løtu at fáa oljuna av vegnum

- Ávaring til allar bilførarar á landsvegnum millum Runavík og Leirvík. Tilbúgvingin í økinum arbeiðir við reingerð á landsvegnum. Tað er toka, so vísið varsemi.

Hesi boðini kom løgreglan við um eitt-tíðina týsdagin. 

Sí eisini: Olja á landsvegnum millum Runavík og Leirvík

Tað var klokkan 12.51, at ein lastbilaførari sjálvur boðaði frá, at olja var farin úr bilinum.

Hetta varnaðist førarin, tá viðkomandi kom til brennistøðina í Leirvík. Olja var byrjað at leka, nakað áðrenn lastbilurin var komin til Lambareiði.

Vaktleiðarin á løgreglustøðini í Havn sigur, at nógv onnur ringdu inn og boðaðu eisini frá hesum eisini.

Klokkan 15.49 í gjár kom fráboðan um, at tilbúgvingin var liðug at rudda og vaska vegin. Í sambandi við arbeiðið lá sokallað kettugrús ymsastaðni á vegnum. 

Tað vóru millum annað sløkkilið í Eysturoynni, ið luttóku í arbeiðnum. 

Onkur slóð av olju kann síggjast enn. Tað er møguligt, at lastbilaførarin fær eina bót, sigur vaktleiðarin.