Tríggir koronatilburðir afturat

Korona smittan breiðir seg framvegis í Føroyum. Í gjár vórðu tríggir nýggir tilburðir staðfestir, ikki eins nógvir og dagin fyri, tá 11 nýggir tilburðir vórðu funnir.

Allir tríggir persónarnir eru smittaðir í Føroyum, og øll eru partur av somu smittuketu, upplýsir landslæknin. Tey smittaðu eru avbyrgd og landslæknin er í gongd við neyðugu smittusporingina.

Í gjár vórðu 1.675 fólk kannað, so nú eru tilsamans 121.107 kanningar gjørdar í Føroyum.

Tilsamans hava nú 451 persónar fingið staðfest smittuna í Føroyum. Í alt eru 416 persónar staðfestir frískir aftur, og sostatt eru 35 persónar smittaðir í løtuni.

Ein persónur er innlagdur á sjúkrahúsi í samband við koronasmittuna.