Tríggir nýggir tilburðir: Nú eru 41 persónar smittaðir

Í gjár vórðu tríggir nýggir smittutilburðir staðfestir, vísa nýggjastu tølini hjá Landslæknanum.

Allir persónar eru smittaðir í Føroyum, og øll eru partur av somu smittuketu. Tey smittaðu eru avbyrgd, og Landslæknin er í gongd við neyðugu smittusporingina, boðar Heilsumálaráðið frá.

Í gjár vórðu 1.277 kanningar gjørdar, og 21 kanningar eru ikki liðugt greinaðar. Tilsamans eru 125.690 kanningar gjørdar í Føroyum.

Við nýggjastu tilburðunum hava nú 458 persónar fingið staðfest koronasmittuna í Føroyum. Av teimum eru 417 staðfestir frískir aftur, og sostatt eru 41 persónar smittaðir í løtuni

Í løtuni er eingin innlagdur. 229 fólk eru í sóttarhaldi.