Trý mál um kynsligan ágang um vikuskiftið

Um vikuskiftið hevur løgreglan fingið tríggjar fráboðanir frá kvinnum, um at tær møguliga hava verið útsettar fyri tað, sum verður nevnt drugrape - tá onkur koyrir doyvandi evnir í drykkin ella matin hjá fólki fyri síðani at útseta tey fyri kynsligum ágangi.

Kvinnurnar hava verið í býnum í Havn, og so hava tær fingið okkurt í gløsini, sum ikki skuldi vera í, og hava tær illgruna um, at tær síðani eru útsettar fyri ágangi.

Tað er ikki vanligt, at løgreglan fær tríggjar slíkar fráboðanir yvir eitt vikuskifti, sigur vaktleiðarin á løgreglustøðini í Havn, sum ikki fær sagt meira um málini, meðan tey enn verða kannað.

– Men hetta er ein áheitan á fólk um at vera ansin, tá tey fara í býin og ikki lata gløsini standa, tá tey eitt nú fara at dansa ella á vesi.