Tvær bøtur fyri brot á skilhaldsreglurnar

Tveir útlendingar hava fingið bót fyri brot á skilhaldsreglurnar í sambandi við ein bardaga í høvuðsstaðnum fríggjakvøldið.

Tað var klokkan 23 fríggjakvøldið, at løgreglan fekk boð um, at tríggir til fimm útlendingar bardust við ein mann í Tórsgøtu í Havn. Tveir teirra vórðu handtiknir, og teir hava nú fingið eina bót á 3.500 krónur í part.

Talan var um útlendingar, sum ikki búgva í Føroyum, verður upplýst av løgreglustøðini í Havn.

Lagt verður afturat, at rættiliga nógv fólk hevur verið í býnum í nátt, men sum heild hevur verið friðarligt.