Tveir bilførarar tiknir fyri at koyra ov skjótt

Tveir bilførarar skulu upp til nýggja koyriroynd eftir at vera avdúkaðir fyri at koyra ov skjótt.

Ferðsluløgreglan gjørdi ferðmátingar í eysturoynni í gjár.

Annar av bilførarunum varð tikin fyri at koyra minst 103 kilometrar um tíman á Skálafjørðinum, og hin koyrdi minst 107 kilometrar um tíman miððum Fjarða nærhendis frákoyringini til Funningsfjarðar.

Ein triði bilførari, í hesum føri lastbilførari, skal rokna fyri at fáa eina stóra bót fyri ikki at hava sítt koyriloyvi í lagið.

Maðurin koyrdi ein stóran og tungan viðfestivogn, men koyrikortið hjá honum loyvdi ikki koyring við so stórum bili. Revsingin fyri hetta er tað sama, sum at koyra uttan koyrikort.